Արցախում գործող բջջային կապի օպերատոր Ղարաբաղ Տելեկոմի ցանցի մասնակի վերականգնման, թողունակության ավելացման և հայաստանյան երեք օպերատորների ու Ղարաբաղ Տելեկոմի միջև բանակցությունների արդյունքում, պայմանավորվածություն է ձեռք բերվել ռոումինգի սակագների իջեցման վերաբերյալ:

Ըստ այդմ՝ 2020թ. հոկտեմբերի 1-ի ժամը 18:00-ից սկսած` 374 97 (Ղարաբաղ Տելեկոմ ՓԲԸ) ցանցում ռոումինգի մուտքային և ելքային (դեպի հայաստանյան երեք օպերատորների ցանցեր), ինչպես նաև դեպի Ղարաբաղ Տելեկոմի բջջային ու ֆիքսված ցանցերի հեռախոսահամարներին զանգերի համար սակագինը կկազմի 5 դրամ 1 րոպեի համար:

Վերը նշված ուղղություններով SMS (կարճ) հաղորդագրությունների սակագինը նույնպես կկազմի 5 դրամ:

Հայտարարված սակագինը կգործի մինչև հավելյալ տեղեկացում:

Սակագների իջեցումը պայմանավորված է Ղարաբաղ Տելեկոմ ՓԲԸ որոշումով՝ հաշվի առնելով ներկայում օպերատորի տեխնիկական հնարավորությունները:

Միևնույն ժամանակ, հորդորում ենք զանգեր կատարել բացառապես ծայրահեղ անհրաժեշտության դեպքում՝ Ղարաբաղ Տելեկոմի ցանցը գերծանրաբեռնվածությունից հնարավորինս զերծ պահելու համար:

Թյուրըմբռնումներն ու անհարկի շահարկումները կանխելու նպատակով, հարկ ենք համարում ևս մեկ անգամ տեղեկացնել, որ ռոումինգը ոլորտի ստանդարտ է, որը տեխնիկապես ներդրված է՝ հիմք ընդունելով հեռահաղորդակցության ոլորտի միջազգային և ներպետական իրավական կարգավորումները:

Հայաստանյան օպերատորները ռոումինգը վերացնելու իրավասություն չունեն, գործում են պետության կողմից տրամադրված լիցենզիայի շրջանակներում՝ բացառապես ՀՀ միջազգայնորեն ճանաչված սահմաններում: