22 ապրիլի 2019 թ., Երևան. Հայաստանում Beeline-ի հասարակայնության հետ կապերի ծառայության ղեկավար Նաիրա Նազարյանը դասախոսություն է կարդացել ԵՊՀ ժուռնալիստիկայի ֆակուլտետի «PR և հաղորդակցային տեխնոլոգիաներ» մագիստրոսական ծրագրի և Հայկական Փի Ար ասոցիացիայի կողմից հիմնադրված PR դպրոցի ուսանողների համար։

Ընկերության PR ղեկավարն ուսանողների հետ կիսվեց որոշ մասնագիտական գաղտնիքներով և ներկայացրեց PR-ի ոլորտում Beeline-ի կատարած աշխատանքը և դրա արդյունքները, կիսվեց հաջողության հասնելու և նպատակներն իրականացնելու իր անձնական փորձով։ Խոշոր ընկերության կողմից իրականացրած գործնական քայլերի ուսումնասիրությունն օգտակար լրացում կլինի ուսանողների տեսական գիտելիքներին։

«Ժամանակի հետ ավելի ու ավելի ակնհայտ է դառնում գրագետ հաղորդակցությունների նշանակությունը հանրային կյանքում և բիզնես, իսկ լավ մասնագետ ունենալը կարևոր է ցանկացած կազմակերպության համար։ Եվ ես այսօր ուրախ եմ կիսվել մեր ընկերության փորձով ու գիտելիքներով, հուսով եմ, որ դրանք օգտակար կլինեն ուսանողների հետագա մասնագիտական գործունեության ընթացքում: Beeline-ը  խոշոր հեռահաղորդակցության ընկերություն է, որն ունի հարուստ փորձ հանրույթի հետ շփման, ինչպես նաև իրականացվող աշխատանքներն ավելի տեսանելի դարձնելու և նորարարական գաղափարներով առաջ շարժվելու համար», - նշեց Հայաստանում Beeline-ի Հասարակայնության հետ կապերի ծառայության ղեկավար Նաիրա Նազարյանը։

«Հայաստանում արհեստավարժ մասնագետների մեծ պահանջարկ կա: ԵՊՀ ժուռնալիստիկայի ֆակուլտետի «PR և հաղորդակցային տեխնոլոգիաներ» մագիստրոսական ծրագիրը բացառիկ հնարավորություն է ամբողջական գիտելիքներ և հմտություններ ստանալու համար, իսկ PR դպրոցը միակ մասնագիտական հարթակն է, որը ոչ ֆորմալ կրթության մեթոդաբանությամբ վերապատրաստում է ոլորտում աշխատող և հանրային կապերով հետաքրքրվողներին: Կարևոր է, որ ուսանողները ծանոթանան ընկերության հաղորդակցության ռազմավարության մշակման և կառավարման գործընթացին, աշխատանքային գործիքներին  և  տեխնոլոգիաներին: Մենք պատրաստում ենք մրցունակ մասնագետներ գործատուների համար»,- նշում է Հայկական PR ասոցիացիայի նախագահ, ԵՊՀ ժուռնալիստիկայի ֆակուլտետի դոցենտ, բ.գ.թ. Աստղիկ Ավետիսյանը:

Դասախոսությունից հետո մասնակիցներն այցելեցին Beeline-ի կապի թանգարանը և ծանոթացան երկրում հեռահաղորդակցության զարգացման պատմության հետ։